為凱恩斯招魂

當連佛利民都話 We are all Keynesian now！

Practical men who believe themselves to be quite exempt from any intellectual influence, are usually the slaves of some defunct economist. Madmen in authority, who hear voices in the air, are distilling their frenzy from some academic scribbler of a few years back.

睇新聞見到 Biden 話計劃用兩萬億美金整基建，腦海第一個浮現嘅詞語就係：「凱恩斯」。美國目前嘅 GDP 大概係 21 萬億，聯邦政府嘅欠債，亦都係咁上下。兩萬億，話多唔算多，但亦唔算少；除開每個人頭計，每個美國人平均盛惠 5714 美金。

以從目前嘅政治形勢去睇，呢個兩萬億嘅基建方案，好大機會通過；雖然共和黨話唔支持加稅去埋單，但佢哋又好難反對呢個建議；因為修路改善食水呢啲工程，其實好多錢最終都係分到落去州、郡政府，以及工程公司。呢啲利益好多都係共和黨嘅支持者。所以純粹從政治操作角度去睇，Biden 呢張牌打得靚。

更靚嘅一張牌，當然係借呢兩萬億去加利得稅。之前都有講過，美債息係咁升，都反映咗市場對聯邦政府財政係有一定嘅擔心。但只要一日大家仍然要用美元去交稅，各國企業同政府，如果要同美國政府交收，都只可以用美元交收，美元始終都有一定嘅購買力嘅。

後生個陣，我一見人鍾意增加政府開支，就條件反射咁話人哋係「凱恩斯主義」。當然，咁樣去標籤人哋，多少都有啲貶義。另一邊廂呢，又有啲人以自己係 「凱恩斯主義者」為榮。當同一個概念可以有咁兩極化嘅觀感，一係就大家其實講緊兩件事，一係就大家真係有好唔同嘅睇法。

不如，來一個小測驗：究竟何謂凱恩斯主義？