【紀事本末】我在自由黨的日子
餘下的真係都只有歷史
香港商界政圈觀察筆記
「吓？乜你係自由黨㗎？」我仲代表過自由黨參選添，不過都廿幾年前嘅事。
今日嘅自由黨，就梗係笑話。但廿幾年前，自由黨不但係一個大黨，而且都係商界同專業人士精英組成。作為一個剛剛大學畢業嘅後生仔，又無乜家底，想認識香港社會嘅另一個階層，入自由黨好正常喎。
我畢業第一份工，就係田北俊嘅助理。之後就轉咗去做夏佳理嘅助理。1999 年試過掛自由黨嘅身份參選；好在輸咗。
之後，離開過；2010 年左右，我甚至拉咗一班人，離開當時嘅自由黨 😂 。
2012 年周梁淑怡約我食飯，又搵返我去幫手；幫手嘅意思係做義工。我好坦白咁講：「有美國居留權，唔參得選，幫下手就無問題。」
其實我都諗咗三幾日，究竟好唔好寫呢篇。畢竟入面嘅人，好多都仍然活躍政壇。但我想講嘅事，其實都係歷史嘅一部份，我相信大家都唔會介意。
如果大家想睇秘聞，我無乜可以出賣。以下都只不過係過來人嘅親身經歷，白頭宮女話當年⋯⋯