Social Origins of Dictatorship and Democracy

比較政治學101 #2

法西斯是如何煉成的

01，我手上呢本書，已經係 1993 年嘅再版。原作 1966 年面世；老土啲咁講，當時正係一個火紅嘅年代。Barrington Moore Jr. 想探討嘅問題，就係革命同現代世界嘅關係。

02，假如無過去嘅革命，我哋今日可能仲係做緊農奴。雖然話人民從來都處於被動嘅位置，但理論上現代社會最重大轉變，就係人嘅選擇比以前更多。至少，我哋有權選擇唔去做農奴。

03，正所謂竊國者侯，盜鈎者誅。歷史係由勝利者所寫，而勝利者，幾乎無可避免都係透過革命奪權。但成功奪權之後，革命嘅人漸漸變成既得利益者；既得利益者，就一定係反革命嘅。《中華人民共和國刑法》 1997 年先至以「顛覆國家政權罪」取代「反革命罪」。

04，馬克斯主義，重點就係革命；高舉馬克斯主義但又唔準講革命，係被閹割緊馬克斯主義。

05，今日好多人將馬克斯主義簡化成反對資本主義。唔好忘記誕生《共產主義宣言》嘅 1848 年，革命思想橫掃歐洲大陸。當時傳統世襲貴族，正為自己嘅存在而爭扎嘅同時，而歐洲嘅普羅大眾，最少有可以分成兩種意識形態。

06，十九世紀歐洲主要城市裡面嘅小資產階級，最主要嘅不滿係物價，但同時又擔心工業化大量生產會令工資下降。當時嘅城市工人階級所面對嘅處境，其實同今日嘅打工仔差唔多。

07，另一班人，就係鄉郊農戶。十九世紀中，歐洲大陸唔同地方，都曾經爆發過天災加人禍綜合而成嘅饑荒。農戶主要針對嘅，係掌握咗土地嘅貴族。

08，以上兩班人所針對嘅階級敵人，本來就有所不同。《共產主義宣言》要團結工人農民；但馬克斯所預言嘅係，資本家將會取代世襲貴族；但由於資本主義嘅剝削，資本家最終都會係自己嘅掘墓人，所以最後先係無產階級將結束私有產權，世界大同。

09，正如上一篇所講，馬克斯主義嘅歷史觀，重點就係經濟生產模式呢個「下層建構」點樣同政治、文化等「上層建構」嘅互動。貫穿 Social Origins of Dictatorship and Democracy 就係呢一種觀點，所以亦有人將作者 Barrington Moore Jr. 歸類為新馬克斯主義者。

＝文章餘下部份，訂戶專享 ＝