後冷戰．紙醉金迷．盛極而衰
最能夠代表香港盛極而衰嘅一幕，我會擇《我至叻》：「叻，我至叻，我哋玻璃可變鑽石⋯⋯」點解去到九零年代，忽然咁多吹奏香港最高最強最大最最最最最？或者一切都要由1979年講起。
01，考考大家（唔準 Google 㗎！），以下幾間公司成立於咩時代：（1）煤氣公司（2）香港電燈（3）中華電力
02，【題示】煤氣街燈，係工業革命嘅象徵，而電燈，就係現代嘅標誌。英國，都係去到維多利亞時代（1837-1901），先開始廣泛使用煤氣燈。而愛廸生嘅第一間發電廠，係 1882 年開始向英國倫敦供電。乜愛廸生唔係美國人咩，點解第一間發電廠係英國嘅？當年嘅倫敦真係世界最繁榮嘅城市；愛廸生係生意人，美國搞創科，但英國倫敦先至係市場。另外，其實當時仲有好多人搞電力，愛廸生只係其中一個。正如我經常講，個人嘅因素真係微不足道；歷史，係時勢做英雄，無話無咗邊個唔得。
