第四個生產要素

點解每次政府粗暴干預市場，結果都適得其反？

2008 年一個冬天嘅夜晚，聯儲局宣佈購入 6000 億嘅按揭證券 MBS；記得當時電視節目裡面我仲識講笑學長毛咁話：「救市不救人，可恥！」

殊不知，6000億原來只不過係頭盤。既然傳統智慧話 don’t fight the FED，當時嘅市場嘅結論亦好明顯係：「要貨唔要錢。」

資產價格升，係唔係好事？可能呢個係一個錯嘅問題。平常心咁應該只問行為嘅後果：「托，個市就升。唔托，咪唔升囉。」

至於後來嘅所謂退市，一直都係得個講字。由 2014 第三季到 2017 第四季，聯儲局嘅資產負債表，都只係叫做維持規模不變。由 2018 第一季到 2019 第二季，即係年半時間，就稍為縮減到 2013 年第三季嘅水平，亦即係伯南克首次提出縮表嘅時候嘅水平。

但到 2019年第四季，其實又開始 QE 4 ；當時 S&P500 大概係 2950 點；就算 2020年第一季被瘟疫擾亂咗，S&P500 到 2021年第一季都就快要升穿 4000 。

「呢次資產價格泡沫，史無前例咁大；但究竟大到點，幾時爆，會唔會爆，無人知。」諗返2008年講呢句說話，講咗，等於無講。過去十幾年，好多次大家都以為 the party is over，結果都係小回大漲。

「泡沫？邊度有泡沫？」