點解科網巨企老闆係左膠？
每間機構，每間公司，其實都係一個權力架構。某程度上，上市公司，就好似民主少少嘅社會，冇上市，就比較似舊世界以血統承繼嘅國度。不過，大家睇真少少，上市公司咪又係王朝，冇上市就更加唔駛講。又換句話說，呢啲公司最高層嘅人，心態同過去嘅封建貴族、統治者冇乜分別。
01，承接 上篇 講 FinTech；今日想先多謝 Chan C C 提醒，其實螞蟻最大嘅價值，可能就係因為佢「不受監管」咁做其他受監管行業做緊嘅嘢；馬後炮咁講，假如螞蟻嘅價值來自佢係可以獨家不受監管咁做金融業務，螞蟻上樹被叫停就一啲都唔難理解。
02，FinTech 最廣義嘅理解，就係一切人類自從有文明以來，逐步透過重新定義產權去釋放價值嘅演進。最初，我哋連咩叫「擁有」都唔知，到後來知道何謂擁有，就出現「交易」。由「交易」，再出現貨幣、借貸⋯⋯