【是日隨筆】不要讓自己淪為一個憤怒的民族主義者

今朝早忽然諗到一個問題：究竟係西方社會對中國充滿偏見？定係神奇國度不斷灌輸對「非我族類」嘅仇恨同歧視呢？

當然，答案亦都可以係： 「兩者都有啲。」

最近我又聽到有人話：「你哋呢啲已經唔係身在香港嘅人，無資格評論香港。」

我唔知道原來評論都要有資格。我只係知道，唔啱聽嘅話，你可以選擇唔聽；但評論真係唔需要講資格。

再者，留底嘅香港人如果可以暢所欲言嘅，真係唔會出現目前呢種情況。好多離開咗嘅人，只不過係希望用自己得到嘅自由，用自己嘅方法，繼續去關注香港。就算制度上香港已經變成神奇國度嘅一部分，都希望文化上香港人呢個身份可以繼續落去。

無錯，我認，每當我見到有人話：「離開咗就唔好咁多聲氣。」我都會覺得好唔忿氣。點解我哋走咗，就好似失去咗本來嘅身份？

我只係希望大家尊重大家嘅選擇；選擇留底都無問題，我亦都無話叫人一定要走。只不過係好多時啲人又擔心聯繫匯率又擔心呢樣個樣，我先至會話：「咁你都係走喇。」

如果唔係，我從來都唔會無喇喇建議人哋做乜做物。留底係選擇，係自由，人哋嘅選擇，唔關任何人事？

而我最擔心係，終有一日會有留低嘅人話：「你哋離開咗嘅，無資格叫自己做香港人。」

而每當我咁講，就一定會有另一班自以為嘅人話：「離開咗，就融入當地社會喇。」

我知道呢種人叫人走咗就唔好望返轉頭嘅人，心底裡可能覺得自己好巴閉，亦都有多少睇唔起啲留底嘅人，覺得佢哋自己攞嚟。有時我亦都會諗，選擇留港嘅朋友，最憎就係呢種嘴臉。

我一早已經係美國人，有呢度嘅生活。只不過，自己早就過咗適應美國生活嘅階段，唔會再成日攞外國生活點滴出來講。因為對我來講，美國已經唔係「外國」。

（加拿大就係外國喇；我自從上個月去咗多倫多一轉，依家個 Facebook 仲未睇到新聞；真係頂佢個肺。）

諗返好多年前，我仍然響香港生活，有一班活在平衡時空嘅 expat 朋友，佢哋可能住咗響香港幾十年，但佢哋嘅生活同工作圈子，同我哋嘅完全唔一樣；佢哋有自己嘅一班人，玩嘅食嘅，同我哋都完全唔一樣。

雖然佢哋大家多都唔識廣東話，唔識中文，最多都係識幾句粗口，「🈲 你老母」、「仆街」、「死鬼佬」等等；雖然係咁，佢哋仍然會覺得自己都係香港人。當然，作為一個唔識廣東話嘅香港人，佢哋亦多少都「甩」唔到自己本來係加拿大人、澳洲人、日本人等等嘅身份。

Cosmopolitanism ，就係一個人可以同時有幾個身份而互相之間唔會有衝突；呢個亦係香港本來嘅獨特之處。

之後就有一班人，日日夜夜強調「首先你係中國人」。當呢個概念就越來越強烈，亦都引起咗一種反作用力，就係「香港人」嘅身份認同。

坦白講，自從 2010 年左右，就開始有香港人嘅身份認同嘅現象；我對呢個趨勢一直都有啲矛盾。一方面，我成世人都係第一次對一個身份有咁強烈嘅感覺，但另一方面理性話畀我知，通常呢啲咁澎湃嘅群眾情緒，往往會有佢嘅排他性。

之前我分享過，返到美國之後，久不久都會遇到啲「唔識講廣東話嘅香港人」。有啲讀者覺得好奇怪，但佢哋睇睇吓先至明白，原來我講緊係啲 expat 「鬼佬」。

諗深一層，大家究竟有冇當過佢哋係香港人呢？正如我以上所講，佢哋真心覺得自己係香港人。

抑或，我哋當中都越來越多人鍾意話邊啲人無資格叫自己做香港人？

我自己就覺得，如果我哋真係好關心香港人呢個身份，唔會想香港人呢個身份，只係得返一代人嘅時間，香港人呢個定義，最好盡量寬鬆一啲喇。

以我自己嘅觀察，好多移民第二代，好快都忘記咗自己香港人呢個身份。甚至乎，我對自己啲仔女都一樣，從來無刻意要灌輸過任何身份認同畀佢哋，甚至乎香港嘅歷史係乜，我都係留返佢哋如果有興趣嘅話，自己去慢慢發掘。

因為我唔想自己變咗好似啲神奇國民咁，成日同人講，唔好忘記自己係一X國個人！

返去最開頭嘅一個問題，究竟係外面嘅世界對中國充滿偏見，定係呢個文化好容易變得排外呢？

究竟排外情緒係點樣形成？有冇見過啲人，只要見到有少少分別，都要攞出來放到有咁大得咁大？又有冇見過啲人，成日開口埋口就話邊個有冇資格講啲乜嘢？

假如你見到一啲人，見到一啲事，會令你覺得好唔開心，覺得好反感，你第一件事唔係爆發，唔係反抗，而係反省自己，會唔會不知不覺間變咗自己最睇唔起個種人。

假如你好不屑小粉紅嘅所作所為，千祈唔好令自己變成一個憤怒嘅民族主義者；立場唔同但行為一樣，係唔會令你啲為人變得更加高尚。

另外，既然香港人嘅民族主義已經出現，我哋可以做嘅，就係令呢個身份，呢個文化，變成有咁開放得咁開放，有咁包容得咁包容。但千祈唔好誤會，我係講文化上嘅開放同包容，而唔係叫大家共同富裕做大愛左膠。

否則，一代人之內，外面嘅世界唔會再有香港人，牆內就更加唔會有香港人。可能有人覺得，香港嘅宿命就係咁。但至少我哋唔會用自己嘅一雙手，去幫北京扼殺香港人嘅身份。